अदृष्टपूर्वं हृषितोऽस्मि...

श्लोकः

गीतोपदेशः

अदृष्टपूर्वं हृषितोऽस्मि दृष्ट्वा भयेन च प्रव्यथितं मनो मे ।

तदेव मे दर्शय देव रूपं प्रसीद देवेश जगन्निवास ॥ ४५ ॥

अयं भगवद्गीतायाः एकादशोऽध्यायस्य विश्वरूपदर्शनयोगस्य पञ्चचत्वारिंशत्तमः(४५) श्लोकः ।

पदच्छेदः

अदृष्टपूर्वं हृषितः अस्मि दृष्ट्वा भयेन च प्रव्यथितं मनः मे तत् एव मे दर्शय देव रूपं प्रसीद देवेश जगन्निवास ॥ ४५ ॥

अन्वयः

देवेश, जगन्निवास ! प्रसीद । अदृष्टपूर्वं दृष्ट्वा हृषितः अस्मि । देव ! मे मनः भयेन प्रव्यथितं च । तत् रूपम् एव मे दर्शय ।

शब्दार्थः

देवेश = सुराधिप !

जगन्निवास = लोकनिकेतन !

प्रसीद = प्रसन्नो भव

अदृष्टपूर्वम् =पूर्वम् अनवलोकितं रूपम्

दृष्ट्वा = विलोक्य

हृषितः = सन्तुष्टः

अस्मि = भवामि

देव = प्रभो

मे मनः = मम चित्तम्

भयेन = भीत्या

प्रव्यथितं च = व्याकुलं च

तत् = पूर्वं दृष्टं रूपम् एव

मे दर्शय = मां प्रदर्शय ।

अर्थः

हे भगवन् ! अद्य यावत् अदृष्टपूर्वं त्वदीयं रूपं दृष्ट्वा अतीव हर्षं प्राप्तवान् । देव ! भीत्या व्यथामपि अहम् अनुभवन् अस्मि । हे देवेश, लोकाधार ! तदेव रूपं मे दर्शय यत् पूर्वं किरीटादिमत्त्वेन सौम्यं रूपं प्रदर्शितम् ।

सम्बद्धसम्पर्कतन्तुः

भगवद्गीता (मूलश्लोकाः)
भगवद्गीता