अथैतदप्यशक्तोऽसि...

श्लोकः

गीतोपदेशः

अथैतदप्यशक्तोऽसि कर्तुं मद्योगमाश्रितः ।

सर्वकर्मफलत्यागं ततः कुरु यतात्मवान् ॥ ११ ॥

अयं भगवद्गीतायाः द्वादशोऽध्यायस्य भक्तियोगस्य एकादशः(११) श्लोकः ।

अथ एतत् अपि अशक्तः असि कर्तुं मद्योगम् आश्रितः सर्वकर्मफलत्यागं ततः कुरु यतात्मवान् ॥ ११ ॥

अथ एतत् अपि कर्तुम् अशक्तः असि ततः मद्योगम् आश्रितः यतात्मवान् सर्वकर्मफलत्यागं कुरु ।

अथ = यदि

एतत् अपि = इदम् अपि

कर्तुम् = आचरितुम्

अशक्तः असि = असमर्थः भवसि

ततः = तर्हि

मद्योगम् = सर्वकर्मसमर्पणम्

आश्रितः = अवलम्बितः

यतात्मवान् = नियतचित्तः

सर्वकर्मफलत्यागम् = सकलकर्मप्रयोजनपरित्यागम्

कुरु = विधेहि ।

यदि विषयाकृष्टचित्तः उपवासव्रतानुष्ठानादीनि कर्माणि अपि आचरितुम् असमर्थः असि तर्हि नियतचित्तः सर्वेषां कर्मणां फलम् अविचारयन् मह्यं समर्पय ।