अनन्याश्चिन्तयन्तो मां...

श्लोकः

गीतोपदेशः

अनन्याश्चिन्तयन्तो मां ये जनाः पर्युपासते ।

तेषां नित्याभियुक्तानां योगक्षेमं वहाम्यहम् ॥ २२ ॥

अयं भगवद्गीतायाः नवमोध्यायस्य राजविद्याराजगुह्ययोगस्य द्वाविंशतितमः(२२) श्लोकः ।

अनन्याः चिन्तयन्तः मां ये जनाः पर्युपासते तेषां नित्याभियुक्तानां योगक्षेमं वहामि अहम् ॥ २२ ॥

अनन्याः ये जनाः मां चिन्तयन्तः पर्युपासते नित्याभियुक्तानां तेषां योगक्षेमम् अहम् वहामि ।

अनन्याः = मामेव आश्रिताः

ये जनाः = ये मानवाः

चिन्तयन्तः = ध्यायन्तः

मां पर्युपासते = मां सेवन्ते

नित्याभियुक्तानाम् = सततयोगिनाम्

तेषाम् = एतेषाम्

योगक्षेमम् = अप्राप्तस्य लाभं प्राप्तस्य च परिपालनम्

वहामि = धारयामि ।

ये जनाः इन्द्रादीन् विहाय मामेव शरणम् आपन्नाः सेवन्ते तेषाम् अप्राप्तस्य प्राप्तिं स्थितस्य च परिरक्षणम् अहं करोमि ।