क्षेत्रज्ञं चापि मां विद्धि...

श्लोकः

गीतोपदेशः

क्षेत्रज्ञं चापि मां विद्धि सर्वक्षेत्रेषु भारत ।

क्षेत्रक्षेत्रज्ञयोर्ज्ञानं यत्तज्ज्ञानं मतं मम ॥ २ ॥

अयं भगवद्गीतायाः त्रयोदशोध्यायस्य क्षेत्रक्षेत्रज्ञविभागयोगस्य द्वितीयः (२) श्लोकः ।

क्षेत्रज्ञं च अपि मां विद्धि सर्वक्षेत्रेषु भारत क्षेत्रक्षेत्रज्ञयोः ज्ञानं यत् तत् ज्ञानं मतं मम ॥ २ ॥

भारत ! सर्वक्षेत्रेषु क्षेत्रज्ञं च अपि मां विद्धि यत् क्षेत्रक्षेत्रज्ञयोः ज्ञानं तत् ज्ञानम् (इति) मम मतम् ।

सर्वक्षेत्रेषु = सकलशरीरेषु

क्षेत्रज्ञम् = क्षेत्रविदम्

विद्धि = जानीहि

क्षेत्रक्षेत्रज्ञयोः = शरीरतद्विदोः

ज्ञानम् = बोधः

ज्ञानम् = साधुः बोधः इति

मम मतम् = मम अभिमतम् ।

भारत ! सकलशरीरेषु क्षेत्रविदम् अपि मां जानीहि । शरीरतद्विदोः बोधः एव बोधः इति मम अभिमतम् ।