ततः स विस्मयाविष्टो...

श्लोकः

गीतोपदेशः

ततः स विस्मयाविष्टो हृष्टरोमा धनञ्जयः ।

प्रणम्य शिरसा देवं कृताञ्जलिरभाषत ॥ १४ ॥

अयं भगवद्गीतायाः एकादशोऽध्यायस्य विश्वरूपदर्शनयोगस्य चतुर्दशः(१४) श्लोकः ।

ततः स विस्मयाविष्टः हृष्टरोमा धनञ्जयः प्रणम्य शिरसा देवं कृताञ्जलिः अभाषत ॥ १४ ॥

ततः हृष्टरोमा सः धनञ्जयः विस्मयाविष्टः शिरसा देवं प्रणम्य कृताञ्जलिः अभाषत ।

ततः = अनन्तरम्

हृष्टरोमा = सरोमाञ्चः

सः धनञ्जयः = सः अर्जुनः

विस्मयाविष्टः = आश्चर्योपेतः

शिरसा = शीर्षेण

देवम् = विष्णुम्

प्रणम्य = नमस्कृत्य

कृताञ्जलिः = बद्धाञ्जलिः

अभाषत = अवदत् ।

अनन्तरं सरोमहर्षः सः अर्जुनः विस्मितः शिरसा विष्णुं नमस्कृत्य कृताञ्जलिः अवदत् ।