तस्मादोमित्युदाहृत्य...

श्लोकः

गीतोपदेशः

तस्मादोमित्युदाहृत्य यज्ञदानतपःक्रियाः ।

प्रवर्तन्ते विधानोक्ताः सततं ब्रह्मवादिनाम् ॥ २४ ॥

अयं भगवद्गीतायाः सप्तदशोध्यायस्य श्रद्धात्रयविभागयोगस्य चतुर्विंशतितमः(२४) श्लोकः ।

तस्मात् ओम् इति उदाहृत्य यज्ञदानतपःक्रियाः प्रवर्तन्ते विधानोक्ताः सततं ब्रह्मवादिनाम् ॥

तस्मात् ब्रह्मवादिनां विधानोक्ताः यज्ञदानतपःक्रियाः ओम् इति उदाहृत्य सततं प्रवर्तन्ते ।

ब्रह्मवादिनाम् = ब्रह्मविदाम्

विधानोक्ताः = शास्त्रविहिताः

यज्ञदानतपःक्रियाः = यागदानतपोरूपाः क्रियाः

उदाहृत्य = उच्चार्य

सततम् = सदा

प्रवर्तन्ते = व्याप्रियन्ते ।

तस्मात् ब्रह्मविदां शास्त्रविहिताः यज्ञदानतपोरूपाः क्रियाः ओम् इति शब्देनैव आरब्धाः भवन्ति ।