त्वमक्षरं परमं...

श्लोकः

गीतोपदेशः

त्वमक्षरं परमं वेदितव्यं त्वमस्य विश्वस्य परं निधानम् ।

त्वमव्ययः शाश्वतधर्मगोप्ता सनातनस्त्वं पुरुषो मतो मे ॥ १८ ॥

अयं भगवद्गीतायाः एकादशोऽध्यायस्य विश्वरूपदर्शनयोगस्य अष्टादशः(१८) श्लोकः ।

त्वम् अक्षरं परमं वेदितव्यं त्वम् अस्य विश्वस्य परं निधानम् त्वम् अव्ययः शाश्वतधर्मगोप्ता सनातनः त्वं पुरुषः मतः मे ॥ १८ ॥

त्वं परमं वेदितव्यम् अक्षरम्, त्वम् अस्य विश्वस्य परं निधानम्, त्वम् अव्ययः, शाश्वतधर्मगोप्ता, त्वं सनातनः पुरुषः मे मतः ।

त्वम् = भवान्

परमम् = उत्कृष्टम्

वेदितव्यम् = ज्ञातव्यम्

अक्षरम् = अनश्वरं ब्रह्म

त्वम् अस्य = त्वम् एतस्य

विश्वस्य = जगतः

परम् = परमम्

निधानम् = आश्रयः

त्वम् अव्ययः = त्वं नाशरहितः

शाश्वतधर्मगोप्ता = सनातनधर्मरक्षकः

त्वं सनातनः = त्वं शाश्वतः

पुरुषः = पुरुषोत्तमः

मे = मम

मतः = अभीष्टः।

त्वम् अनश्वरम् उत्कृष्टं ब्रह्म, त्वम् अस्य जगतः आधारः, त्वं नाशरहितः सनातनधर्मरक्षकः च त्वं शाश्वतः पुरुषोत्तमः च असि । एवम् अहं जानामि ।