दृष्ट्वेदं मानुषं रूपं...

श्लोकः

गीतोपदेशः

अर्जुन उवाच -

दृष्ट्वेदं मानुषं रूपं तव सौम्यं जनार्दन ।

इदानीमस्मि संवृत्तः सचेताः प्रकृतिं गतः ॥ ५१ ॥

अयं भगवद्गीतायाः एकादशोऽध्यायस्य विश्वरूपदर्शनयोगस्य एकपञ्चाशत्तमः(५१) श्लोकः ।

दृष्ट्वा इदं मानुषं रूपं तव सौम्यं जनार्दन इदानीं अस्मि संवृत्तः सचेताः प्रकृतिं गतः ॥ ५१ ॥

जनार्दन ! सौम्यं मानुषम् इदं तव रूपं दृष्ट्वा इदानीं प्रकृतिं गतः सचेताः संवृत्तः अस्मि ।

जनार्दन = श्रीकृष्ण !

सौम्यम् = प्रसन्नम्

मानुषम् = मानवीयम्

इदम् = एतत्

तव रूपम् = ते रूपम्

दृष्ट्वा = अवलोक्य

इदानीम् = अधुना

प्रकृतिम् = पूर्वावस्थाम्

गतः = प्राप्तः

सचेताः = प्रसन्नमनाः

संवृत्तः = सञ्जातः

अस्मि = भवामि ।

श्रीकृष्ण ! प्रसन्नं मानवीयम् एतत् तव रूपं दृष्ट्वा अधुना प्रसन्नमनाः प्रकृतिस्थः च सञ्जातः अस्मि ।