न तु मां शक्यसे द्रष्टुम्...

श्लोकः

गीतोपदेशः

न तु मां शक्यसे द्रष्टुमनेनैव स्वचक्षुषा ।

दिव्यं ददामि ते चक्षुः पश्य मे योगमैश्वरम् ॥ ८ ॥

अयं भगवद्गीतायाः एकादशोऽध्यायस्य विश्वरूपदर्शनयोगस्य अष्टमः(८) श्लोकः ।

न तु मां शक्यसे द्रष्टुम् अनेन एव स्वचक्षुषा दिव्यं ददामि ते चक्षुः पश्य मे योगम् ऐश्वरम् ॥ ८ ॥

अनेन स्वचक्षुषा एव मां द्रष्टुं न शक्यसे । ते दिव्यं चक्षुः ददामि । ऐश्वरं मे योगं पश्य ।

अनेन = एतेन

स्वचक्षुषा एव = स्वनेत्रेण एव

मां द्रष्टुम् = माम् अवलोकितुम्

न तु शक्यसे = न समर्थः भवसि

ते = तुभ्यम्

दिव्यम् = अलौकिकम्

चक्षुः = नेत्रम्

ददामि = यच्छामि

ऐश्वरम् = ईश्वरसम्बन्धि

मे योगम् = मम सामर्थ्यम्

पश्य = अवलोकय ।

एतेन नेत्रेण एव मां द्र्ष्टुं त्वं समर्थः न भवसि । अतः तुभ्यम् अलौकिकं नेत्रं यच्छामि येन ईश्वरस्य मम असाधारणं सामर्थ्यं पश्य ।