बृहत्साम तथा साम्नां...

श्लोकः

गीतोपदेशः

बृहत्साम तथा साम्नां गायत्री छन्दसामहम् ।

मासानां मार्गशीर्षोऽहमृतूनां कुसुमाकरः ॥ ३५ ॥

अयं भगवद्गीतायाः दशमोऽध्यायस्य विभूतियोगस्य पञ्चत्रिंशत्तमः(३५) श्लोकः ।

बृहत् साम तथा साम्नां गायत्री छन्दसाम् अहम् मासानां मार्गशीर्षः अहम् ऋतूनां कुसुमाकरः ॥ ३५ ॥

तथा साम्नां बृहत्साम । छन्दसाम् अहं गायत्री । मासानां मार्गशीर्षः अहम् । ऋतूनां कुसुमाकरः ।

तथा = एवम्

साम्नाम् = साम्नाम्

बृहत्साम = बृहत्साम

छन्दसाम् = छन्दोविशिष्टानां मन्त्राणाम्

अहं गायत्री = अहं गायत्री ऋक्

मासानाम् = द्वादशमासानाम्

अहं मार्गशीर्षः = अहम् आग्रहायणिकः मासः

ऋतूनाम् = षण्णाम् ऋतूनाम्

कुसुमाकरः = वसन्तः ।

तथा सामसु अहं बृहत्साम अस्मि । छन्दोविशिष्टानाम् ऋचाम् अहं गायत्रीच्छन्दः अस्मि । द्वादशसु मासेषु मार्गशीर्षः अहम् । षण्णाम् ऋतूनाम् अहं वसन्तः ।