मां हि पार्थ व्यपाश्रित्य...

श्लोकः

गीतोपदेशः

मां हि पार्थ व्यपाश्रित्य येऽपि स्युः पापयोनयः ।

स्त्रियो वैश्यास्तथा शूद्रास्तेऽपि यान्ति परां गतिम् ॥ ३२ ॥

अयं भगवद्गीतायाः नवमोध्यायस्य राजविद्याराजगुह्ययोगस्य द्वात्रिंशत्तमः (३२) श्लोकः ।

मां हि पार्थ व्यपाश्रित्य ये अपि स्युः पापयोनयः स्त्रियः वैश्याः तथा शूद्राः ते अपि यान्ति परां गतिम् ॥ ३२ ॥

पार्थ ! पापयोनयः ये अपि स्त्रियः वैश्याः तथा शूद्राः स्युः ते अपि मां व्यपाश्रित्य परां गतिं यान्ति हि ।

पार्थ = पृथायाः पुत्र !

पापयोनयः = पापात्मानः

ये अपि = ये केचन अपि

स्त्रियः = नार्यः

वैश्याः = वैश्यकुलजाः

तथा = एवम्

शूद्राः = शूद्रकुलजाः

स्युः = भवेयुः

ते अपि= ते मानवाः अपि

मां व्यपाश्रित्य = माम् आश्रित्य

पराम् = उत्तमाम्

गतिम् = स्थानम्

यान्ति हि = निश्चयेन लभन्ते ।

ये पापाधिक्यवशात् जाताः ते स्त्रियः स्युः, वैश्याः स्युः, शूद्रा वा स्युः ते सर्वेऽपि मां सेवमानाः परमां शान्तिम् अवाप्नुवन्तीति निश्चितम् ।