यथा नदीनां बहवो...

श्लोकः

गीतोपदेशः

यथा नदीनां बहवोऽम्बुवेगाः समुद्रमेवाभिमुखा द्रवन्ति ।

तथा तवामी नरलोकवीरा विशन्ति वक्त्राण्यभिविज्वलन्ति ॥ २८ ॥

अयं भगवद्गीतायाः एकादशोऽध्यायस्य विश्वरूपदर्शनयोगस्य अष्टाविंशतितमः(२८) श्लोकः ।

यथा नदीनां बहवः अम्बुवेगाः समुद्रम् एव अभिमुखाः द्रवन्ति तथा तव अमी नरलोकवीराः विशन्ति वक्त्राणि अभिविज्वलन्ति ॥ २८ ॥

यथा नदीनां बहवः अम्बुवेगाः समुद्रम् एव अभिमुखाः द्रवन्ति तथा अमी नरलोकवीराः अभिविज्वलन्ति तव वक्त्राणि विशन्ति ।

यथा = येन प्रकारेण

नदीनाम् = स्त्रोतसाम्

बहवः = असङ्ख्याकाः

अम्बुवेगाः = जलप्रवाहाः

समुद्रम् एव = सागरम् एव

अभिमुखाः = सम्मुखाः सन्तः

द्रवन्ति = प्रवहन्ति

तथा = तेन प्रकारेण

अमी = एते

नरलोकवीराः = मर्त्यलोकशूराः

अभिविज्वलन्ति = प्रकाशमानानि

तव = ते

वक्त्राणि = मुखानि

विशन्ति = प्रविशन्ति ।

यथा स्रोतसाम् असङ्ख्याकाः जलप्रवाहाः सागरम् एव अभिमुखीभूय प्रविशन्ति तथा एते शूराः प्रकाशमानानि तव मुखानि प्रविशन्ति ।