हन्त ते कथयिष्यामि...

श्लोकः

गीतोपदेशः

श्रीभगवान् उवाच -

हन्त ते कथयिष्यामि दिव्या ह्यात्मविभूतयः ।

प्राधान्यतः कुरुश्रेष्ठ नास्त्यन्तो विस्तरस्य मे ॥ १९ ॥

अयं भगवद्गीतायाः दशमोऽध्यायस्य विभूतियोगस्य नवदशः(१९) श्लोकः ।

हन्त ते कथयिष्यामि दिव्याः हि आत्मविभूतयः प्राधान्यतः कुरुश्रेष्ठ न अस्ति अन्तः विस्तरस्य मे ॥ १९ ॥

कुरुश्रेष्ठ ! हन्त | (या:) आत्मविभूतयः दिव्याः हि (ता:) ते प्राधान्यतः कथयिष्यामि । मे विस्तरस्य अन्तः नास्ति ।

कुरुश्रेष्ठ = कुरुपुङ्गव !

हन्त = अहो !

दिव्याः हि = दिव्याः

आत्मविभूतयः = स्वस्य ऐश्वर्यविशेषाः

च ते = तुभ्यम्

प्राधान्यतः = मुख्यत्वेन

कथयिष्यामि = वदिष्यामि

मे विस्तरस्य = मम विभूतीनां वैशाल्यस्य

अन्तः = अवधिः

नास्ति = न विद्यते ।

कुरुपुङ्गव ! अधुना स्वस्य दिव्येषु ऐश्वर्येषु प्राधान्यतः कानिचिदेव कथयिष्यामि । यतः मम विभूतीनाम् अन्तः नास्ति ।