प्रह्लादश्चास्मि दैत्यानां...

श्लोकः सम्पादयतु

गीतोपदेशः

प्रह्लादश्चास्मि दैत्यानां कालः कलयतामहम् ।

मृगाणां च मृगेन्द्रोऽहं वैनतेयश्च पक्षिणाम् ॥ ३० ॥

अयं भगवद्गीतायाः दशमोऽध्यायस्य विभूतियोगस्य त्रिंशतितमः(३०) श्लोकः ।

प्रह्लादः च अस्मि दैत्यानां कालः कलयताम् अहम् मृगाणां च मृगेन्द्रः अहं वैनतेयः च पक्षिणाम् ॥ ३० ॥

दैत्येषु प्रह्लादः च अस्मि । कलयत्सु अहं कालः । मृगेषु च अहं मृगेन्द्रः । पक्षिषु च वैनतेयः ।

दैत्यानाम् = दानवानाम्

प्रह्लादः अस्मि = हिरण्यकशिपुपुत्रः अस्मि

कलयताम् = गणनं कुर्वताम्

अहं कालः = अहं समयः

मृगाणां च = जन्तूनाम् अपि

अहं मृगेन्द्रः = अहं सिंहः

पक्षिणाम् = खगानाम्

वैनतेयः च = गरुडः च ।

दानवेषु अहं प्रह्लादः अस्मि । गणनं कुर्वत्सु अहं समयः, मृगेषु मृगराजः सिंहः, पक्षिषु पक्षिराजः गरुडश्च अस्मि ।