पवनः पवतामस्मि...

श्लोकः

गीतोपदेशः

पवनः पवतामस्मि रामः शस्त्रभृतामहम् ।

झषाणां मकरश्चास्मि स्रोतसामस्मि जाह्नवी ॥ ३१ ॥

अयं भगवद्गीतायाः दशमोऽध्यायस्य विभूतियोगस्य एकत्रिंशत्तमः(३१) श्लोकः ।

पवनः पवताम् अस्मि रामः शस्त्रभृताम् अहम् झषाणां मकरः च अस्मि स्रोतसाम् अस्मि जाह्नवी ॥ ३१ ॥

अहं पवतां पवनः अस्मि, शस्त्रभृतां रामः, झषाणां मकरः अस्मि,स्रोतस‌ां च जाह्नवी अस्मि।

पवताम् = पावयितॄणाम्

पवनः अस्मि = वायुः अस्मि

शस्त्रभृताम् = आयुधधारिणाम्

अहं रामः = अहं परशुरामः / दाशरथिः रामः

झषाणाम् = मत्स्यादीनाम्

मकरः च अस्मि = नक्रः च अस्मि

स्रोतसाम् = नदीनाम्

जाह्नवी अस्मि = गङ्गा अस्मि ।

पावयितॄणां मध्ये अहं वायुः अस्मि । आयुधधारिषु कुठारकधरः परशुरामः (कोदण्डधरः श्रीरामः) अस्मि । मत्स्यादिषु मकरः अस्मि । नदीषु पवित्रतमा गङ्गा अस्मि ।