दण्डो दमयतामस्मि...

श्लोकः

गीतोपदेशः

दण्डो दमयतामस्मि नीतिरस्मि जिगीषताम् ।

मौनं चैवास्मि गुह्यानां ज्ञानं ज्ञानवतामहम् ॥ ३८ ॥

अयं भगवद्गीतायाः दशमोऽध्यायस्य विभूतियोगस्य अष्टात्रिंशत्तमः(३८) श्लोकः ।

दण्डः दमयताम् अस्मि नीतिः अस्मि जिगीषताम् मौनं च एव अस्मि गुह्यानां ज्ञानं ज्ञानवताम् अहम् ॥ ३८ ॥

दमयतां दण्डः अस्मि । जिगीषतां नीतिः अस्मि । गुह्यानां मौनं च एव अस्मि । ज्ञानवतां ज्ञानम् अहम् ।

दमयताम् = दमयितॄणाम्

दण्डः = दमनम् अस्मि

जिगीषताम् = जेतुमिच्छताम्

नीतिः = नीतिः अस्मि

गुह्यानाम् = गोप्यानाम्

मौनं च एव = मौनमेव अस्मि

ज्ञानवताम् = ज्ञानयुक्तेषु

ज्ञानम् = प्रज्ञानम् अहम् ।

दमयितॄणां दमनम् अस्मि । जेतुम् इच्छतां नीतिः अस्मि । गोप्यानां मौनम् अपि । ज्ञानिनां प्रज्ञानम् अहम् अस्मि ।