यच्चापि सर्वभूतानां...

श्लोकः

गीतोपदेशः

यच्चापि सर्वभूतानां बीजं तदहमर्जुन ।

न तदस्ति विना यत्स्यान्मया भूतं चराचरम् ॥ ३९ ॥

अयं भगवद्गीतायाः दशमोऽध्यायस्य विभूतियोगस्य नवत्रिंशत्तमः(३९) श्लोकः ।

यत् च अपि सर्वभूतानां बीजं तत् अहम् अर्जुन न तत् अस्ति विना यत् स्यात् मया भूतं चराचरम् ॥ ३९ ॥

अर्जुन ! सर्वभूतानां यत् बीजं तत् अपि अहम् । मया विना चराचरं भूतं यत् स्यात् तत् नास्ति ।

अर्जुन = हे अर्जुन !

सर्वभूतानाम् = सकलभूतानाम्

यत् बीजम् = यत् प्ररोहकारणम्

तत् अपि अहम् = तदपि अहमेव

मया विना = मां विना

यत् चराचरम् = स्थावरजमम्

यत् स्यात् = यत् भवेत्

तत् नास्ति = तद्वस्तु न विद्यते ।

अर्जुन ! सर्वभूतानां यत् प्ररोहकारणम् अस्ति तत् अपि अहम् । मया विरहितं यत्किञ्चिदपि स्थावरजमं नैव भवितुम् अर्हति । तादृशं किमपि न विद्यते एव ।