यथा प्रदीप्तं ज्वलनं...

श्लोकः

गीतोपदेशः

यथा प्रदीप्तं ज्वलनं पतङ्गा विशन्ति नाशाय समृद्धवेगाः ।

तथैव नाशाय विशन्ति लोकास्तवापि वक्त्राणि समृद्धवेगाः ॥ २९ ॥

अयं भगवद्गीतायाः एकादशोऽध्यायस्य विश्वरूपदर्शनयोगस्य नवविंशतितमः(२९) श्लोकः ।

यथा प्रदीप्तं ज्वलनं पतङ्गा विशन्ति नाशाय समृद्धवेगाः तथा एव नाशाय विशन्ति लोकाः तव अपि वक्त्राणि समृद्धवेगाः ॥ २९ ॥

यथा समृद्धवेगाः पतङ्गाः प्रदीप्तं ज्वलनं नाशाय विशन्ति तथा एव समृद्धवेगाः लोकाः तव वक्त्राणि अपि नाशाय विशन्ति ।

यथा = येन प्रकारेण

समृद्धवेगाः = तीव्ररयाः

पतङ्गा = शलभाः

प्रदीप्तम् = ज्वलितम्

ज्वलनम् = अग्निम्

नाशाय = विनाशाय

विशन्ति = प्रविशन्ति

तथा एव = तेन प्रकारेण एव

समृद्धवेगाः = तीव्ररयाः

लोकाः = प्राणिनः

तव वक्त्राणि अपि = तव मुखानि अपि

नाशाय =विनाशाय

विशन्ति = प्रविशन्ति ।

यथा तीव्रगतयः पताः ज्वलितम् अग्निम् आत्मविनाशाय प्रविशन्ति तथा एव तीव्रगमनाः प्राणिनः तव मुखानि स्वविनाशाय एव प्रविशन्ति ।