मा ते व्यथा मा च...

श्लोकः

गीतोपदेशः

मा ते व्यथा मा च विमूढभावो दृष्ट्वा रूपं घोरमीदृङ्ममेदम् ।

व्यपेतभीः प्रीतमनाः पुनस्त्वं तदेव मे रूपमिदं प्रपश्य ॥ ४९ ॥

अयं भगवद्गीतायाः एकादशोऽध्यायस्य विश्वरूपदर्शनयोगस्य नवचत्वारिंशत्तमः(४९) श्लोकः ।

मा ते व्यथा मा च विमूढभावः दृष्ट्वा रूपं घोरम् ईदृक् मम इदम् व्यपेतभीः प्रीतमनाः पुनः त्वं तत् एव मे रूपम् इदं प्रपश्य ॥ ४९ ॥

घोरम् ईदृक् मम रूपं दृष्ट्वा ते व्यथा मा, विमूढभावः च मा । त्वं व्यपेतभीः प्रीतमनाः मे तत् एव इदं रूपं पुनः प्रपश्य ।

घोरम् = भयरम्

ईदृक् = ईदृशम्

मम इदम् रूपम् = मम एतद्रूपम्

दृष्ट्वा = अवलोक्य

ते = तव

व्यथा मा = भयं मास्तु

विमूढभावः च मा = मूढचित्तत्वं च मास्तु

व्यपेतभीः = अपगतभयः

प्रीतमनाः = सन्तुष्टचित्तः

मे तदेव इदम् = मम स्थितपूर्वमेव तत्

रूपम् = स्वरूपम्

पुनः प्रपश्य = भूयः ईक्षस्व ।

भयरम् ईदृशं मम इदं स्वरूपम् अवलोक्य तव भयं मास्तु । त्वम् अपगतभयः सन्तुष्टचित्तः मम स्थितपूर्वं तदेव स्वरूपं पुनः पश्य ।