भक्त्या मामभिजानाति...

श्लोकः

गीतोपदेशः

भक्त्या मामभिजानाति यावान्यश्चास्मि तत्त्वतः ।

ततो मां तत्त्वतो ज्ञात्वा विशते तदनन्तरम् ॥ ५५ ॥

अयं भगवद्गीतायाः अष्टादशोऽध्यायस्य मोक्षसंन्यासयोगस्य पञ्चपञ्चाशत्तमः(५५) श्लोकः ।

भक्त्या माम् अभिजानाति यावान् यः च अस्मि तत्त्वतः ततः मां तत्त्वतः ज्ञात्वा विशते तदनन्तरम् ॥

भक्त्या तत्त्वतः यावान् यः च अस्मि (तादृशं) माम् अभिजानाति ततः मां तत्त्वतः ज्ञात्वा तदनन्तरं विशते ।

भक्त्या = भक्तियोगेन

तत्त्वतः = परमार्थतः

यावान् = यादृशपरिमाणविशिष्टः

यः च अस्मि = यादृक्स्वरूपविशिष्टः च अस्मि

अभिजानाति = सम्यक् वेत्ति

तत्त्वतः = वस्तुतः

विशते = प्रविशति ।

सः भक्त्या प्रथमं सर्वत्र व्याप्तं सच्चिदानन्दस्वरूपं च मां जानाति ततः मामेव प्रविशति अर्थात् मय्येव लीनो भवति ।