त्रिभिर्गुणमयैर्भावैः...

श्लोकः

गीतोपदेशः

त्रिभिर्गुणमयैर्भावैरेभिः सर्वमिदं जगत् ।

मोहितं नाभिजानाति मामेभ्यः परमव्ययम् ॥ १३ ॥

अयं भगवद्गीतायाः सप्तमोध्यायस्य ज्ञानविज्ञानयोगस्य त्रयोदशः(१३) श्लोकः ।

त्रिभिः गुणमयैः भावैः एभिः सर्वम् इदं जगत् मोहितं न अभिजानाति मामेभ्यः परम् अव्ययम् ॥ १३ ॥

गुणमयैः त्रिभिः एभिः भावैः इदं सर्वं जगत् मोहितम् । एभ्यः परम् अव्ययं मां न अभिजानाति ।

गुणमयैः = गुणविकारैः काममोहादिभिः

त्रिभिः = त्रिविधैः

एभिः = एतैः

भावैः = पदार्थैः

इदम् = एतत्

सर्वम् = सकलम्

जगत् = भुवनम्

मोहितम् = व्यामोहितम्

(तस्मात्) एभ्यः = (तस्मात्) एतेभ्यः

परम् = विलक्षणम्

अव्ययम् = नाशरहितम्

मां न अभिजानाति = मां न वेद ।

काममोहादयः सत्त्वादीनां गुणानां विकाराः । तैः विभ्रान्ताः इमे जनाः तान् गुणविकारान् अतीत्य वर्तमानं मां ज्ञातुं न शक्नुवन्ति ।