कामैस्तैस्तैर्हृतज्ञानाः ...

श्लोकः

गीतोपदेशः

कामैस्तैस्तैर्हृतज्ञानाः प्रपद्यन्तेऽन्यदेवताः ।

तं तं नियममास्थाय प्रकृत्या नियताः स्वया ॥ २० ॥

अयं भगवद्गीतायाः सप्तमोध्यायस्य ज्ञानविज्ञानयोगस्य विंशतितमः(२०) श्लोकः ।

कामैः तैः तैः हृतज्ञानाः प्रपद्यन्ते अन्यदेवताः तं तं नियमम् आस्थाय प्रकृत्या नियताः स्वया ॥ २० ॥

तैः तैः कामैः हृतज्ञानाः स्वया प्रकृत्या नियताः तं तं नियमम् आस्थाय अन्यदेवताः प्रपद्यन्ते ।

तैः तैः = अनेकविधैः

कामैः = अभिलाषैः

हृतज्ञानाः = अपगतविवेकाः

स्वया = स्वकीयेन

प्रकृत्या = स्वभावेन

नियताः = नियन्त्रिताः

तं तम् = बहुप्रकारम्

नियमम् = जपोपवासरूपं नियमम्

आस्थाय = आश्रित्य

अन्यदेवताः = इतरदेवताः

प्रपद्यन्ते = भजन्ते ।

अनेकविधैः अभिलाषैः अपगतविवेकाः केचन जनाः स्वस्य स्वभावेन नियन्त्रिताः सन्तः तं तं जपोपवासादिरूपं नियमम् आश्रित्य मां विहाय अन्याः देवताः भजन्ते ।