यो यो यां यां तनुं भक्तः...

श्लोकः

गीतोपदेशः

यो यो यां यां तनुं भक्तः श्रद्धयार्चितुमिच्छति ।

तस्य तस्याचलां श्रद्धां तामेव विदधाम्यहम् ॥ २१ ॥

अयं भगवद्गीतायाः सप्तमोध्यायस्य ज्ञानविज्ञानयोगस्य एकविंशतितमः(२१) श्लोकः ।

यः यः यां यां तनुं भक्तः श्रद्धया अर्चितुम् इच्छति तस्य तस्य अचलां श्रद्धां ताम् एव विदधामि अहम् ॥ २१ ॥

यः यः भक्तः यां यां तनुं श्रद्धया अर्चितुम् इच्छति तस्य तस्य ताम् एव अचलां श्रद्धाम् अहं विदधामि ।

यः यः भक्तः = यः यः भजनशीलः

यां यां तनुम् = यां यां मूर्तिम्

श्रद्धया = आसक्त्या

अर्चितुम् = आराधयितुम्

इच्छति = अभिलषति

तस्य तस्य = भक्तस्य

ताम् एव = तादृशीम् एव

अचलाम् = स्थिराम्

श्रद्धाम् = आसक्तिम्

विदधामि = करोमि ।

यः यः भक्तः यां यां मूर्तिं श्रद्धया अर्चितुम् इच्छति तस्य भक्तस्य तादृशीम् एव स्थिरां श्रद्धाम् अहं करोमि ।