रसोऽहमप्सु कौन्तेय...

श्लोकः

गीतोपदेशः

रसोऽहमप्सु कौन्तेय प्रभास्मि शशिसूर्ययोः ।

प्रणवः सर्ववेदेषु शब्दः खे पौरुषं नृषु ॥ ८ ॥

अयं भगवद्गीतायाः सप्तमोध्यायस्य ज्ञानविज्ञानयोगस्य अष्टमः(८) श्लोकः ।

रसः अहम् अप्सु कौन्तेय प्रभा अस्मि शशिसूर्ययोः प्रणवः सर्ववेदेषु शब्दः खे पौरुषं नृषु ॥ ८ ॥

कौन्तेय ! अहम् अप्सु रसः, शशिसूर्ययोः प्रभा, सर्ववेदेषु प्रणवः, खे शब्दः, नृषु पौरुषम् अस्मि ।

कौन्तेय = कुन्तीपुत्र !

अहम् अप्सु = अहम् उदके

रसः = माधुर्यरसः

शशिसूर्ययोः = चन्द्रार्कयोः

प्रभा= कान्तिः

सर्ववेदेषु = निखिलवेदेषु

प्रणवः = ओंकारः(ॐ)

खे = आकाशे

शब्दः = ध्वनिः

नृषु =मानवेषु

पौरुषम् = पुरुषत्वम्

अस्मि = भवामि ।

कौन्तेय ! अहम् उदकेषु माधुर्यम्, चन्द्रसूर्ययोः कान्तिः, सर्ववेदेषु ओंकारः, आकाशे ध्वनिः, मानवेषु पुरुषत्वं च अस्मि ।