महात्मानस्तु मां पार्थ...

श्लोकः

गीतोपदेशः

महात्मानस्तु मां पार्थ दैवीं प्रकृतिमाश्रिताः ।

भजन्त्यनन्यमनसो ज्ञात्वा भूतादिमव्ययम् ॥ १३ ॥

अयं भगवद्गीतायाः नवमोध्यायस्य राजविद्याराजगुह्ययोगस्य त्रयोदशः(१३) श्लोकः ।

महात्मानः तु मां पार्थ दैवीं प्रकृतिम् आश्रिताः भजन्ति अनन्यमनसः ज्ञात्वा भूतादिम् अव्ययम् ॥ १३ ॥

पार्थ ! दैवीं प्रकृतिम् आश्रिताः महात्मानः तु मां भूतादिम् अव्ययम् ज्ञात्वा अनन्यमनसः भजन्ति ।

पार्थ = अर्जुन

दैवीम् = देवसम्बन्धिनम्

प्रकृतिम् = स्वभावम्

आश्रिताः = प्राप्ताः

महात्मानः तु = महानुभावाः तु

मां भूतादिम् = मां सर्वभूतकारणम्

अव्ययम् = अविनाशिनम्

ज्ञात्वा = विदित्वा

अनन्यमनसः = एकाग्रचित्ताः

भजन्ति = सेवन्ते ।

सत्त्वगुणप्रधानाः महात्मानस्तु देवानां प्रकृतिम् आश्रिताः मां सर्वेषां भूतानां कारणम् अविनाशिनं च मत्वा एकाग्रचित्ताः सन्तः मां ध्यायन्ति ।