समोऽहं सर्वभूतेषु...

श्लोकः

गीतोपदेशः

समोऽहं सर्वभूतेषु न मे द्वेष्योऽस्ति न प्रियः ।

ये भजन्ति तु मां भक्त्या मयि ते तेषु चाप्यहम् ॥२९ ॥

अयं भगवद्गीतायाः नवमोध्यायस्य राजविद्याराजगुह्ययोगस्य नवविंशतितमः(२९) श्लोकः ।

पदच्छेदः

समः अहं सर्वभूतेषु न मे द्वेष्यः अस्ति न प्रियः । ये भजन्ति तु मां भक्त्या मयि ते तेषु च अपि अहम् ॥२९ ॥

अन्वयः

अहं सर्वभूतेषु समः । द्वेष्यः मे न अस्ति, प्रियः न । ये तु मां भक्त्या भजन्ति ते मयि अहं तेषु च अपि ।

शब्दार्थः

सर्वभूतेषु = सकलभूतेषु

अहं समः = अहं तुल्यः

मे = मम

द्वेष्यः न अस्ति = वैरी नास्ति

न प्रियः = प्रीतिविषयः नास्ति

ये तु = ये च

मां भक्त्या = मां प्रीत्या

भजन्ति = सेवन्ते

ते मयि = ते मयि वर्तन्ते

अहं तेषु च अपि = अहं तेषु अपि वर्ते ।

अर्थः

अहं सर्वेषु अपि प्राणिषु समानः । न मे कुत्रचित् द्वेषो वर्तते । नापि कुत्रचित् प्रीतिः । किन्तु ये मां भजन्ति तेषामहं शैत्यपीडितानाम् अग्निरिव उपकारको भवामि । तेऽपि मया उपकृताः भवन्ति ।

सम्बद्धसम्पर्कतन्तुः

भगवद्गीता (मूलश्लोकाः)
भगवद्गीता