मय्यावेश्य मनो ये मां...

श्लोकः सम्पादयतु

गीतोपदेशः

श्रीभगवानुवाच -

मय्यावेश्य मनो ये मां नित्ययुक्ता उपासते ।

श्रद्धया परयोपेतास्ते मे युक्ततमा मताः ॥ २ ॥

अयं भगवद्गीतायाः द्वादशोऽध्यायस्य भक्तियोगस्य द्वितीयः(२) श्लोकः ।

मयि आवेश्य मनः ये मां नित्ययुक्ताः उपासते श्रद्धया परया उपेताः ते मे युक्ततमाः मताः ॥ २ ॥

ये मनः मयि आवेश्य नित्ययुक्ताः परया श्रद्धया उपेताः माम् उपासते ते मे युक्ततमाः मताः ।

ये = ये जनाः

मनः = चित्तम्

मयि = परमात्मनि

आवेश्य = प्रवेश्य

नित्ययुक्ताः = सततसमाहिताः

परया = प्रकृष्टया

श्रद्धया = आसक्त्या

उपेताः = समन्विताः

माम् उपासते = मां भजन्ते

ते = ते जनाः

मे = मम

युक्ततमाः = योगिश्रेष्ठाः

मताः = सम्मताः ।

ये जनाः चित्तं मयि निवेश्य सततसमाहिताः प्रकृष्टया श्रद्धया समन्विताः मां भजन्ते ते जनाः मम योगिश्रेष्ठाः मताः ।